Gabayga: Guudkii Hiraab Curiye: Abwaan Faarax Shuuriye

Gabayga ‘Guudkii Hiraab’ wuxuu ka mid yahay gabayada abwaan Faarax Shuuriye, kuwooda ugu miisaanka culus, uguna saamaynta badan. Wuxuu ka curiyey shibbane ka mid ah shibbanayaahsa af soomaaliga maanso ahaan ugu dhadhan iyo dhisme adag. Shibbanaha ga’da.

Dhanka kale, Gabayga ‘Guudkii Hiraab’ sida abwaan Faarax Shuuriye looga bartay, aniguna aanba tilmaam ka sokow, aan naynaas iyo uga dhigay summad, wuxuu ku adeegsanayaa ISBARBARDHIGYO mug iyo macno weyn leh, isaga oo si qotodheer ugu fogaaday ekaysiinta iyo metelaad uu hogotusmeynta ugu soo qaadanayo.

Sida aan ku sheegnay gabaygii: ‘Rubacyaleey’ oo sababtiisu ahayd, in qolyo magacooda qariyey, in ay damceen, in ay gabay ama maanso ku duraan abwaan Faarax Shuuriye, markaasna uu isaga oo u caqlicelinaya ayuu abwaan Faaarx ku yiri:

Marka hore, inta aannaan u gelin sababta gabaygan keentay, aan faalleynno magaca beesha ku soo arooray gabayga, ee uu ku xusayo abwaan Faarax Shuuriye, oo ah Hiraab. Haddaba, Hiraab waa mid ka mid ah beelaha Soomaaliyeed kuwooda ugu waaweyn, uguna saamayn badan dalka, farac ahaanna ku abtirsada Gorgaarte Hawiye.

Hiraab wuxuu dhalay afar wiil oo walaal ahaa, oo lagu kala magacaabo: Madar Kicis Hiraab (Habar Gidir), Maxamuud Hiraab (Duduble), Muddullood Hiraab iyo Martiile Hiraab (Sheekhaal), faracoodana ay ka falliirmeen dad magac iyo boqortooyo ku yeeshay geyiga Soomaalida.

Degaan ahaan beesha Hiraab waxay degaan dhul weyn oo ballaaran, oo waxay ku firirsan yihiin baaxadda dhulka Jamhuuriyadda Federaalka ah ilaa iyo Soomaali Galbeed iyo NFD.

Markanna waxaan faaqideynaa sababta gabayga curintiisa lahayd, oo sida halbeegga iyo meerisyadaba aad ka garandoontaan ay ahayd, in qof magaciisa qariyey uu u gabyey beesha Hiraab, weliba uu waxoogaa jareexo ama dhaleecayn ah la doontay.

Markaa ayaa abwaan Faarax Shuuriye, oo xilliga gabayga uu curinayo ku sugnaa magaalada xeebeedka faca weyn ee Xarar Dheere, wuxuu maqlay hadallada xanafta leh ee loo jeediyey beeshiisa Hiraab, maadaama uu abwaan Faarax Shuuriye u dhashay beesha Maxamad Madar Kicis (Cayr).

Abwaan Faarax ma ahayn nin aragti iyo la gabbada hadale, waxaa u cantami waayey qofka gabayga liidan oo af ahaan iyo dhisme midna u qummanayn tiriyey, haddana, ku aflagaaddeeyey beel uu in uu tol ahaan ku abtirsada ka sokow, haddana, uu ku tiirsan yahay, iyaguna tirsada.

Labadaa markii ay isu qaban waysay abwaan Faarax Shuuriye, ayuu wuxuu tiriyey gabaygan qaraweynida ay u dheer tahay qiimiga afeed iyo eray ee ku jira, oo galay taariikhda, oo ah gabay mudan, in lagu keydiyo xarumaha afka, siiba kuwooda maansada daryeela ama daneeya.

Abwaan Faarax Shuuriye gabaygan wuxuu ugu gooddiyey, si qofka maqla, ay isla markiiba dareen cabsi ah u gasho, oo ku tusinaysa culayska erayada uu doortay iyo isbarbardhigyada uu ku qotomiyey, si uu gudbiyo farriinta uu rabo, ee uu u gudbinayey dadka hadaaqa u gabyey.

Marka uu abwaan Faarax Shuuriye maska iyo micidiisa, libaaxa iyo gawriirsigiisa, badda iyo mawjadaheeda, geesiga iyo dagaalyahanka waranka wata iyo ninka toogashada u xiran, ee cabsida la lowlabaya, oo dhammaantood dadkaas uu abwaan Faarax leeyahay waxay halis ugu jiraan, in ay naftu uga baxdo qatarta ay ku dhexjiraan awgeed, haddaan Eebbe ku galladin badbaadadiisa, taana waxaa la mid ah, qofka u bareeray, in uu u gabyo guudkii Hiraab isaga oo aan geeri ku ogeyn abwaan Faarax, in uu ku sugan yahay qatar u dhiganta ama ka daran taas.

Marka abwaan Faarax Shuuriye wuxuu ku yiri gabaygii: ‘Guudkii Hiraab’ sidan:

Dhammaad.

Erayfur:

(1) Maarre: qori ka mid ah qoryihii ee hal keligi loo ridi jiray.

(2) ‘Hadallo gaarsiiyey’ ayaa iyana la weriyaa.

Tifaftirid: Bashiir ‘Ina Cubtan‘

Mahdin gaar ah; Abwaan Maxamad Xuseen Faarax.